Aùil vras zou… hag un tammig on shuèh ha trist. Piah em es afer berman e zou treu dous ha tuem ha me lakei de num santein tuem ha dous abarh eùe. Ohpenn tra i es afer a galorieu, ker er gouianù zou i tunet ha ma n’es ket nitra de loskein ne gerho ket en duemmerez diabarh!
Er sekred-kegein-man zou eit ur pred em es mi ijinet pe oen i labourat in ur musé istoer viù. Me labour oe gobir seblant bout ur voéz ag er rakistoer (amzir en hoarn, d’er liésan, mas arriùet é dein seùel taulieu-mein eùe!). Ha mi vourré i alejein bouid in ur pod-pri ar tan en uéled! Che aman un dra e alejen liés eit me hansorted, hag e oen guelet mat geté eiton! N’es nameit treu abarh e vezé debet g’er gelted in amzir en hoarn 🙂
Eit ur podad pri a youd (pi ur gastelodenn ;)):
Mill
Mil
Tammeu avaleu sèh (ag er stal bio)
Keneu kalvé
Halen
Ne skriùan ket pegemen hou es afer a beb tra: en dra-sen e zepant doh pegement e tebet, ha ma faut doh bout ur youd lan a dreu arall, pe ketoh youd de getan hag un nebet avaleu ha keneu eit er goust. El reson e vou dousoh er youd ma lakeit muioh a vil hag a avaleu.
Lakeit er mill in ur gastelodenn pi ur pod-pri get en avaleu sèh trohet i tammigeu, er heneu-kalvé flastret, er mil hag ur granig halen. Ohpennet deur (rekis é lakaat diù uèh muioh a zeur eit a vil) ha tuemmet. Lakeit de verùein épad un uigent munut bennag (mar alejet er bouid ar tan en uéled i lakeit un tamm hiroh), betag ma vou dariù er mill, ha daet de vout ur youd tiù.
PS: treu arall e vezé debet ur bouchad g’er gelted:
Edaj: segal, kerh (ha youd-kerh!), ‘epotr’ (ouian ket pinaus laret)
Kig: moh, deved, beùein, pisked ag er vrou (en arvour)
Fourmaj leah
Legumaj ha frèhaj: fer, pour, karot, kignein guiù, panéz, mouiar, skaù
Evaj: bier, chouchenn
Ha mi oér mi petra hoah!
Bouid! 