Kaviar Auberjin

Oh, na fiskal é er plad-man!

Ne ouien ket petra keginein hiniù, ha chom e rae un auberjinenn de vout impliet founnapl. Ha nesen deit chuj dein ag un dra em boe debet i Pariz in un ti-bouid Georgiad: kaviar auberjin. Du-hont em boe kaùet ag er choej, ha de me chuj ne vehe ket diés-bras gobir sort treu ir gir. Ha deit on abenn! D’é ket er hanùal tout, mes tost awal, ha lipous, me lar doh!

Chetu kaviar auberjin, mod Ennys (aman e ran get diù auberjinenn, ker unan d’é ket trawal – hoant hou pou debein muioh 😉 )

– diù auberjinenn, diblusket ha trohet a dammeu

– tri tamm kignen, trohet a dammeu bitig

– ur penn ougnon bras pi deu ré vihan (ketoh deu ré vihan, muioh a houst zou geté), trohet a dammeu bihan

– ur loéiad tahini (koéven sesam)

– chug un hantir sitronenn

-ivl olivl

-halen, pibr

Tuemmet ivl olivl in ur bélon, ha frintet er hignen. A pe vé dous ha lan a houst er hignen, ohpennet en tammeu auberjin. Kejet ha dalhet de gejein betag ma vou ker blot en tammeu auberjin e hellet ou flastrein ged er loe-goed.

Ohpennet en halen hag er pibr, ha lakeit en auberjin ha kignen in ur volen. Flastret! Ohpennet berman en tammeu ougnon kri, en tahini hag er chug sitron. Kejet pep tra, ha lakeit er haviar ar un tamm bara. Lipouuuuus !

 

 

Uieu mod er Spagn

Hiniù eh an de bartajein genoh ur rekipé n’em es ket disket toutafed get ur hamarad dein, mes men aùenet en des-ean in ur laret e vé debet i brou-Spagn uieu poahet in ur saus tomat get legumaj abarh. En dra-sen oe ohpenn ur blé zou, mes er suhun baset em boe hoant gobir un dra bennak un tamm dishanùal doh kustum get uieu, ha chujet em boe ir piah en doe kontet dein. Che aman en disoh.

Afér zou a:

Deu pi tri ui

Ur penn-ougnon, trohet a dammeu

Un tam kignen, trohet a dammeu

Ur penn-poavron, trohet a dammeu

Ur gourjetenn, trohet a dammeu

Passato di pomodoro (galleg: colis de tomate)

Kumin malet

Chili malet

Halen, pibr, ivl olivl

Lakeit en ivl olivl de duemmein in ur bélon vras, ha frintet en uieu hag er hignén betag ma veint rouzet. Lakeit er legumaj arall eùe ha frintet. Ohpenned er passato, hag ur lomm deur aveid ma ne vou ket ré diù er saus. Lakeit er spiseu, ha leusket en treu de veruein ar tan dous epad un uigent munut bennag.

Torret en uieu adreist er bélon, el ma raheh uieu frintet. Nameit a pe vé poahet en uieu er uèh-man! Leusket, hemb kejein, de viruein betag ma vou poèh en uieu.

Eas ha fasil!

Guneh-tu – spesial dedikass poloneg de vMarion

Me haméradez Marion zou bet i chom i brou Pologn épad ur bléad aveid hi labour. El reson hi doe manket dein ur bochad, ker ni vourr i um uélet aveid debein asambl, laret kaer, iùet ré a uein ha hoarhein el diù follez. Monet de gonserteu ha festeu-nouz e ramb eùe asambl, fin, Marion e vanke dein!

Ha pedegur ema hun tradision debein asambl, hun doe laret e vehe debet bouid a vrou pologn aveid lidein hi distro ir vrou. Dein-mi e oe de geginein er plad tuem, nesen mi de houlenn geti petra vé debet liés ir vrou-sen. Reskont me hamiradez? “KASHA”!

Kasha? Petra en diaul é en treu-sen? ‘Zelé bout egsotek-bras, ma m’es ket james kliùet konz anehé….

Mes pas! Alafein, des ket kal a dra breizekoh aveit er hasha. Ker gran gunèh-tu é. Gunèh-tu, hur plantenn vroadel! Goudé bout goulennet get Albert, pautr ker gouiziek a-ziar bouid er bed, penaus alejein kasha, em boe groeit me fladad guneh-tu mod er reter ketan. Ha mad é er goust! Ker mad on dalhet de obér get kasha i modeu dishanùal, ha de ijinein me rekipéieu dein-mi geté. Chetu unan vejetarian, mad ha és.

Afer hou es a:

Kasha (kaùet vé ir stal bio)

Ougnon i tammeu bihan

Kignen i tammeu bitik

Avaldoar i tammeu bihan

Karot i tammeu bihan

Aval i tammeu bihan

Ur hub hud vejetarian

un ui

ivl olivl

FOURMAJ CHEDDAR!!!! 😀

Tuemmet en ivl olivl in ur bélon vras, ha lakeit en ougnon hag er hignein de rostein abarh. Ohpennet er hasha ha lakeit de rostein eùe. Goudi un deu vunut bennag, ohpennet en ui ha kejet betag ma vou seh en ui, ha peget doh er hasha hemb gobir tammeu – ret é dasparhein toud en ui.

Pend é seh en ui, e lakeit er legumaj arall hag e kejet tammigeu irauk lakaat trawal a zeur eit béein toud en treu, mes pas muioh, hag er hub hud. Lausket de boéhein ar tan dous épad un hantirériad.

Goudi e sellet mard é poèh en avaldoar – mard é poèh en avaldoar e heller bout sur ema darriù er hasha eùe – ha lonket pi mogedet toud en deur. Ne faut ket doh gobir seben. Mard é mad toud en treu-sen, e ohpennet kement a cheddar el ma karet i tammeu bihan, de vout téet barh er friko. Chetu er piah e ra er goust burhuduz e zou g’er plad-man.

Matte kalonne, chomet tuem ha seh!

kig oén get hei ha legumaj-gouianù

Opala, é-pad pell amzér n’em boé ket skriùet aman! Miah arnein…

Ur yoh treu zou arriù genein eùe: kollet me labour, groeit en diùiz gobér un dézen i brou-Gembré, munet de vrou-Gembre…leh ma hon berman, a-houdi un toullad deùéhieu. Braù é aman, in ur ‘hottaj’ eh on i chom, un ti bihan ar er mézeu. Tan in oéled, me hah koutant dirazon, er glaù ir-méz… braù ha trankil er vuhi ir vakanseu aman. Des ket toemmereh erbet kemeid en tan-koed, nesen ema yein tammigeu eùe. Hag amzir yein e dalù, i mem bed-mi ataù, friko bras eit chomel tuem. Dré ma hon i brou Gembré, chetu un tamm friko groeit g’er piah e zou aman: kig oén ha legumaj gouianù. En hei em boé laeret get men dousig karonti, mes moian zou ean prenein ir stal bio, eùe.

Afer zou a:

Kig oén mad eit er friko, i tammeu (lakam ur lur)

aval-doar, i tammeu eùe (tri ré vras pi muiog a ré vihan)

karot, Tri ré vras pi muioh a ré vihan eùe

deu benn-ougnon

un tamm kignén

deu zornad hei ront

ur loéiad té (pi muioh ma faot doh) paprika malet

un hantér loéiad (pi el ma faut deoh) chili malet

ur granig jinjambr malet

ur granig komein malet

halen, pibr

ivl olivl!

El toud er rékipéieu-friko ema és-bras haniah. Lakeit en ivl olivl de duemmat in ur bélon vras. Frintet en ougnon ha kignen, lakeit er hig eùe a pe vé dous en ougnon. Kejet ha frintet. A pe vé rouzet er hig e lakeit en avaldoar hag er harot, ha trawal a zeur eit poéhein en holl. Lakeit en hei eùe, hag er spiseu.

Lakeit de boéhein ar tan dous é-pad diù ériad de vihannan.

Matte kalonne!

Pasta Salmonara

El m’hou poé diùinet el reson (ker hui zou rah tud a spéred), nend é ket er pasta salmonara nitra kemeit ur harbonara get saumon i-lèh er hig-sall. Neoah eh an de rein er rékipé doh. Pedegur ne ouian ket ré pesort sekred-kegein rein doh berman modarall (be zou ur bochad em es de rein hoah, mes en aùen ne za ket d’er plah lézidant-man). Ha pedegur é unan ag en treu matan er vuhi….hag unan ag er ri fallan aveit er holesterol. Me ne chujam ket in treu vil-sen. Er saumon, el ma ouiet, zou lan a omega 3 hag e sikour en empenn de labourat founnaploh. Nesen ma tebet lies awal ag en toezenneu-man, e voh spéredekoh, founnaploh ha luemmoh a spéred dré vras. Che.

Nesen, afer zou a:

toézenneu

ur penn-ougnon, trohet a dammeu

piz bihan sklaseit

saumon mogedet, trohet a dammeu

un nebet loéiadeu koéven fresk

2 ui dré zén

un dornad fourmaj parmiggiano dré zén.

Ivl olivl

Es é: darriuet en toézenneu de getan. Goudi e tuemmet en ivl in ur bélon vras, hag e lakeit en ougnon de rouzein abarh innan. Lakeit er saumon eùe, ha goudi er piz-bihan sklaseit. Tuemmet ha kejet, ha goudi ur munut pe zeu, lakeit en toézenneu. Lakeit er hoéven, ha kejet. Lakeit er uieu hag er fourmaj, ha kejet hoah. Lakeit chemel ar en tan betag ma vou darriu er uieu; kejet ur uèh en amzir.

Kalon d’hou pouid!

Kofte get asperjez

Men digaré tudeu, ne skriùan ket kal ir hours-men…Ne santan ket kal a aùen ha kement a dreu zou de hobir, a uehieu ne ouian ket mui i-menn e kaùein en amzir aveid gobir pep tra e zou ret dija, nesen en treu aveid er bluja’ur bihannoh hoah…

Mes en nihour em es saùet ur sekred a feson ur sort! El er lodenn vrasan a me rekipéieu ema ganet er rékipé-man dré ma oe ret dein achuiein un nebet treu a me frigo: en asperjez hag er hig malet er uèh-man. Groeit em es kofte geté, pi albondigas, el ma vé laret i spagnoleg: boulleu kig frintet, lies awal get legumaj abarh. Gramb hiniù kofte/albondigas/albondofte get asperjez!

Afer hou es a:

– 300 gram kig malet, beùein pi oen

– 300 g asperjez

– 1 loéiad ‘piar spis’

– 2 loéiad bled amandez (amandez malet)

– halen, pibr, ivl olivl

De gentan, diblusket en asperjez, trohet-int a dammeu ha poéhet-int i deur berù betag ma veint dous. Sehet-int goudi, ha lakeit in ur vol vras get er hig, er spiseu hag en diù loéiad bled amandez. Malet berman pep tra get er mekanik-kegein, betag m’hou pou un toéz-kig seh awal aveit gobir boulleu anehon. Ma nend’é ket seh awal, e lakeit ur loéiad bled amandez ohpenn.

Tuemmet berman en ivl olivl in ur billig – lakeit trawal a ivl, un hantirviziad bennag de vihannan- ha frintet er hofte. Mad int de zebein elleman, ma faut doh gobir el spagnoliz en ou zebet get sauz tomat.

Matte kalonne!!

Rhubarb crumble mod ennys

Deit é en neùi-hanù!! Guir é, ker be zou heol ha pousined i kanein, ha rhubarb vé guerhet ar marhad en Alré. Dilun paset em boe er boneur de brenein en tammeu deùéhan e chome. Er vakanseu é, nesen on lezidant, nesen oen deùéhat ir marhad. Daskauz!

Er rhubarb-sen oe just trawal eit gobir ur hrumble a-feson. N’em es ket héliet sekred erbet, kemeit en awen, el ma tae…Ha chetu er piah em es groeit. Awen ur spered vad em es bet, sur é.

Aveit er rhubarb:

Rhubarb, ur bochad, i tammeu bihan

Chug ur sitronenn glas

Tri tamm mad a jinjambr kristalizet, i tammeu bitig

sukr el ma karet, mes ne lakeit ket ré vihan a sukr, modarall vou trenk

Lakeit rah en treu-man asambl in ur gastelodenn, ha lakeit ur lommig deur geté – PAS RE. Ne lakeit ket trawal eit béein rah er rhubarb miam, just ur biziad bennag. Modarall ret seben-rhubarb, ne faut ket deoh.

Lausket de doemmein ha de virùein betag ma vou fondet er rhubarb, ha ne chom kemet ur youd tiù.

Lakeit er youd in ur voll katiaù, ha streùet er hrumble arnehon.

Eit gobir er hrumble:

150g bled

150 g sukr

150 g amonenn

Ma faut deoh (pas ret) treu kras el ma karet: un dornad flakenneu kerh, tammeu katiau seh malet etre en deuorn…

Kejet er bled, er sukr hag en amonenn eit ma vo ur hrumble!

Lakeit er hrumble i tammeu bihan (crumbles, i sauzneg) ar er rhubarb, ha dariuet ir fourn tuemmet betag 200 degré durant 20 munut.

Pokeu deoh!

Ennys

Katiau Dimitri (épinard ha feta)

Deit on a-benn!! Groeit em es katiau el ma ra Dimitri, pautr bro Gress ha guerhour katiau sall, shoarma ha nommigeu arall i straedeu Utrecht! Ouh, na koutant on *foenù* *foenù*.

Er lod muian ahanoh, sur awal, n’ou des ket james debet spanakopita, kateùaj delikat get épinard ha feta. Mes mi lar-mi doh, un dra bennag e vank in hou puheieu…hag hiniù é me labour-mi rein deoh en doére mat, rékipé er spanakopita!

Afer hou es a:

Toéz katiau sall (greit g’en toéz aveid empanadas ha borekitas em es reit i rekipe ‘katiau malardé’, pi bezet lézidant ha prenet toéz ‘brisé’..)

un 300 gram bennag a épinard fresk

un 150 gram bennag a fourmaj feta

Ur penn-ougnon, trohet a dammeu

Un dornad mat a geneu-pein

Chug ur penn-sitron

Halen, pibr, ur granig ‘piar spis’

Ivl olivl

Poéhet en épinard just hir awal eit ma vihannei, de laret é un deu vunut bennag. Trohet a dammeu bihan goudi, ha par ur miam gobir rostet er heneu pein.

Tuemmet en ivl olivl in ur bélon, ha lakeit en tammeu ougnon de rouzein abarh. Ohpennet en épinard, kejet, hag ohpennet en halen, pibr ha piar spis, ha chug er penn-sitron. Kejet hoah, ha lausket de zivogedein betag ma ne chomou ket mui kal a zeur.

Durant en amzir-sen trohet er feta a dammeu bitig, ha kejet g’en treu arall. Berman e zelé bout ur braù a veskaj g’ur goust mad abominapl!

Lakeit ur loéad meskaj in ur rondig a doéz, ha cherret eit gobir katiau. Sellet doh er hatiau malardé eit gouiet petra faut dein laret. Ma faut doh gobir katiau brasoh aveit me ré bitig ha moutig, petra ‘vir? Nitra!

Lakeit ir fourn, 25 minut àr 180°C, ha goudi…matte kalonne 😀

Toézenneu eit er feneanted

A pe ven shuèh ha fatiget, pi tapet ur friad genein, e teban tost berped toezenneu. Déverrus é. Sur awal e ran i mod-sen (hag estroh aveidein e ra) pedegur ema ken és en toezenneu…ha ker mat ar un drou. Hag er rekipe em es groeit tuchant zou yah, miam! Afin, me gerd-mi ema yah. En déieu-man ned on ket gwall aùenet g’er gegein, ha nesen e ran un tamm kejajeu a bep sort – henan e han de bartajein genoh, ha mard oh fur e roein doh ur rekipé eit salad get asperj ha sausis-saumon eùe. Hineah erhat ne ramb kemeit toezenneu – en dibenn-suhun omb, ne labouramb ket ré alkent!

Piah zou afer:

Toezenneu ‘tagliatelle’

tomat

fourmaj feta

un dornadig gran pein

lezeu er provans

ur granig harissa

Es; poehet en toezenneu, troh durant ma vent i poehein en tomat hag er feta a dammeu, hag a pe vé dariù en toezenneu, laket rah en treu asambl, ha kejet.

Matte kalonne, mes dihoallet: be zou bitamineu abarh!!

Katiaù sal ag en nean

Goudi kig yar ag en nean un nebet mizieu zou berman katiau sal ag en nean. Er piah e zou bet lakeit in neu? Me saus tomat get ur granig chug sitron – just un dapennig treu trenk e lak rag er perd-bouid de vout fiskal. Hag ohpenn-sen i es fourmaj. Hmmmm fourmaj…ha polenta! Prest oh eit er sekred? Eh an de rein dohtu 😀

Aveid er polenta:

Un tasad (pi ardrou 100 gram) polenta

4 tasad deur

Ur loéiad-kafé paprika malet

ur granig chili malet

Halen ha pibr

Lakeit rah en treu asambl in ur gastelodenn ha tuemmet. A pe grog en treu de viruein, kejet ha dahlet a gejein betag ma vou tiù er polenta (d’er liesan goudi ur pemp munut bennak). Lakeit er polenta de yeinaat in ur moll-katiaù: a pe vou yein, e vou solud er gateùenn.

Eit er hatiaù:

Saus tomat:

Passato di pomodoro (tomat flastret..)

chug un hantir sitronenn

Ur loéiad sukr

Halen ha pibr

–> Kejet en treu-man in ur vol ha goloeit er gateùenn-polenta a saus tomat.

Lakeit fourmaj parmizan ha ri’rall, el ma karet ar er saus tomat (m’es mi lakeit cheddar eùe – sod on g’er cheddar).

Lakeit legumaj ar er fourmaj – m’es mi lakeit tammeu paprika ha tokeu-touseg, mes moian zou gobir revé hou koust. El ma uélet sur awal e tenn er rekipé-man tammigeu doh ur pizza 😉

Tuemmet er gateùenn ir fourn durand un hantir ériad ar 200°C. Gorteit ur pemp munut bennak irauk debein a pe vou prest, amzir d’er gateùenn de num soludein indrou.

Matt kalonne!!